മഴക്കാലത്തെ ആഹാരക്രമം.

ചൂടു കാലത്തില്‍ നിന്നും തികച്ചും വിഭിന്നമായ ഒരു ആഹാരക്രമം മഴക്കാലത്ത് പാലിക്കുന്നത് ശരീരത്തിന് നന്നായിരിക്കും.ജലാംശം കുറഞ്ഞതും നന്നായി വേവിച്ചതുമായ ഭക്ഷണമാണ് മഴക്കാലത്ത് ഏറ്റവും നല്ലത്.അരിയും ഗോതമ്പും ഉപയോഗിച്ച് ഉണ്ടാക്കുന്ന ഭക്ഷണ പദാര്‍ഥങ്ങള്‍ കൂടുതല്‍ കഴിക്കുന്നത് ശരീരത്തെ സംബന്ധിച്ചിടത്തോളം ഗുണകരമായിരിക്കും. റാഗിയുടേയും മൈദയുടേയും ഉപയോഗം കഴിയുന്നത്ര കുറയ്ക്കണം.


ഔഷധമൂല്യങ്ങള്‍ അടങ്ങിയ ഔഷധ കഞ്ഞി അതിനാല്‍ തന്നെ ഈ സമയത്തെ ഭക്ഷണക്രമങ്ങളില്‍ ഒന്നാണ്.മാംസാഹാരം കഴിക്കുന്നവര്‍ മഴക്കാലത്ത് കൂടുതലായി ആട്ടിന്‍‌മാസം ഉപയോഗിക്കുന്നത് നന്നായിരിക്കും.ദഹനക്കേടുണ്ടാകാതിരിക്കാന്‍ തിപ്പലി, കാട്ടുതിപ്പലി വേര്, കാട്ടുമുളകിന്‍ വേര്, ചുക്ക് എന്നിവ ചേര്‍ത്ത് തിളപ്പിച്ച വെള്ളം കുടിക്കാം. ദിവസേന തേന്‍ കഴിക്കുന്നതും നല്ലതാണ്. മാമ്പഴം, മുന്തിരി, ഈന്തപ്പഴം, വാഴപ്പഴം, കൈതച്ചക്ക, മധുരനാരങ്ങ എന്നീ പഴങ്ങളും ചെറുപയര്‍, മുതിര, ഉഴുന്ന് എന്നീ പയറുവര്‍ഗ്ഗങ്ങളും വെണ്ടയ്ക്ക, വഴുതനങ്ങ, ചേന, ചുരയ്ക്ക, സവാള, ചുവന്നുള്ളി, വെളുത്തുള്ളി, അമരയ്ക്ക, പാവയ്ക്ക, പച്ചപ്പയര്‍, കൊത്തമര, ബീന്‍സ് എന്നീ പച്ചക്കറികളും പാലും പാലുല്‍പ്പന്നങ്ങളും കഴിക്കാം.